زۆرينەى توێژينەوەكانى گۆڤارێكى نێودەوڵەتى، هى توێژەرانى زانكۆى كۆيەيە

News #01, Issue 23, Sep 2016 | Núcey #01, Jhimarey 23, Mangí 9 Sallí 2016 | نوچەی 1، ژمارەى 23 مانگی 9 ساڵی 2016

له‌ دوا ژماره‌ى گۆڤارێكى نێوده‌وڵه‌تیدا، كۆى توێژینه‌وه‌ بڵاوكراوه‌كان، له‌لایه‌ن مامۆستایانى زانكۆى كۆیه‌وه‌ پێشكه‌شكراون

گۆڤارى IJOKS كه‌ كورتكراوه‌ى ( گۆڤارى نێوده‌وڵه‌تى خوێندنى كوردی) یه‌، گۆڤارى ئه‌لیكترۆنی خاوه‌ن ژماره‌ى جیهانییه‌، له‌ لایه‌ن به‌شى كوردۆلۆجى زانكۆى دیجله‌ له‌ شارى (ئامه‌د) ى وڵاتى توركیا به‌شێوه‌ى وه‌رزى و له‌ ساڵێكدا دوو ژماره‌ی له‌ مانگه‌كانى (1) و (8) دا بڵاوده‌بێته‌وه‌.

گۆڤارى IJOKS له‌ مانگى یه‌كه‌مى ساڵى 2014 ه‌وه‌ ده‌ركه‌وتووه‌، ئامانجى ئه‌و گۆڤاره‌ وه‌ك خۆیان ئاماژه‌ى پێده‌كه‌ن بریتییه‌ له‌ پێشكه‌شكردنى لێكۆڵینه‌وه‌ى ئاست به‌رزى ئه‌كادیمیى سه‌باره‌ت به‌ زمان و نه‌ته‌وه‌ى كورد هه‌ر له‌ دێر زه‌مانه‌ تا ئه‌مڕۆ. هه‌روه‌ها كاریگه‌رى كورد له‌هه‌موو لایه‌نه‌كانه‌وه‌ به‌سه‌ر ناوچه‌كانى ڕۆژهه‌ڵاتى ناوه‌ڕاست و وڵاتى نێوان دوو ڕووباره‌كه‌و ئاسیاى ناوه‌ڕاست و ئه‌وروپا بایه‌خ پێده‌دات، كه‌وا كورد له‌هه‌موو ئه‌و ناوچانه‌دا بڵاوبۆته‌وه‌.

گۆڤاره‌كه‌ به‌شێوه‌یه‌كى كراوه‌ و بێبه‌رامبه‌ر بڵاوده‌كرێته‌وه‌و مه‌به‌ست له‌مه‌شدا ئه‌وه‌یه‌ له‌ ته‌واوى جیهاندا خوێنه‌ران به‌بێ هیچ كۆسپ و ته‌گه‌ره‌یه‌ك بتوانن بابه‌ته‌كانى گۆڤار بخوێننه‌وه‌و ببێته‌ هۆكارێك بۆ بیروڕا ئاڵوگۆڕكردن له‌ بواره‌كانى مه‌عریفه‌دا.

IJOKS هه‌ر بابه‌تێكى بۆ بڵاوكردنه‌وه‌ پێبگات له‌لایه‌ن ده‌سته‌ى نووسه‌رانه‌وه‌ هه‌ڵسه‌نگاندنى بۆ ده‌كرێت و به‌ نهێنى و به‌بێ ئاشكرا كردنى ناوى خاوه‌نه‌كه‌ى له‌لایه‌ن دوو هه‌ڵسه‌نگێنه‌رى پسپۆڕه‌وه‌ په‌سه‌ند ده‌كرێت ئنجا مافى بڵاوكردنه‌وه‌ى پێده‌درێت.

ئه‌م گۆڤاره‌ گۆڤارێكى نێوده‌وڵه‌تى خاوه‌ن ژماره‌و پێگه‌ى تایبه‌ت به‌خۆیه‌تى و له‌لایه‌ن (ئه‌كادیمیای توركیا) و (Journal Park) ( توبیتاك) باوه‌ڕپێكراوه‌.

له‌ دوا ژماره‌یدا كه‌وا له‌ مانگى 8 ئاب ـ ى 2016 بڵاوكراوه‌ته‌وه‌، له‌كۆى 5 پێنج بابه‌تی بڵاوكراوه‌یدا، سێ بابه‌تییان بریتیین له‌ توێژینه‌وه‌ى ئه‌كادیمى، ئه‌و سێ توێژینه‌وه‌ش هه‌رسێكییان له‌لایه‌ن مامۆستایانى زانكۆى كۆیه‌وه‌ پێكه‌شكراون، كه‌ بریتین له‌:

1. A Comparative Study) - Syntactic Devices Expressing Focus in English and Kurdish) كه‌ بریتییه‌ له‌توێژینه‌وه‌یه‌كى زمانه‌وانى به‌زمانى ئینگلیزى سه‌باره‌ت به‌ شێوازى (جه‌ختكردن) وه‌ك به‌راوردكاری له‌نێوان هه‌ردوو زمانى كوردى و ئینگلیزى و له‌لایه‌ن (مامۆستا ئاره‌زوو رشید عوسمان) مامۆستا له‌به‌شی زمانى ئینگلیزى ـ فه‌كه‌ڵتى زانسته‌ مرۆڤایه‌تى و كۆمه‌ڵایه‌تییه‌كان ى زانكۆی كۆیه‌وه‌ پێشكه‌شكراوه‌.

2. (Adjectives in Kurdish language: Comparison between dialects) كه‌ بریتییه‌ له‌ توێژینه‌وه‌یه‌ك به‌ زمانى ئینگلیزى سه‌باره‌ت به‌ (ئاوه‌ڵناو) له‌ دیالێكته‌ جیاجیاكانى زمانى كوردى، ئه‌م توێژینه‌وه‌یه‌ كارێكى هاوبه‌شه‌ له‌لایه‌ن (پ.ی. د. حه‌سه‌ن كه‌ره‌جان) سه‌رنووسه‌رى گۆڤاره‌كه‌و مامۆستا له‌به‌شی كوردۆلۆجى زانكۆی دیجله‌ له‌ ئامه‌دو (م.ی. هیوا سه‌لام خالید) مامۆستا له‌ به‌شی زمانى كوردى فه‌كه‌ڵتى په‌روه‌رده‌ى زانكۆی كۆیه‌، پێشكه‌شكراوه‌.

3. (ڕه‌هه‌نده‌كانى په‌روه‌رده‌كار له‌ شیعری كه‌ریم ده‌شتى دا)، كه‌ لێكۆڵینه‌وه‌ى ڕه‌خنه‌ییه‌ به‌ زمانى كوردى سه‌باره‌ت به‌ ڕه‌هه‌ندى په‌روه‌رده‌گار له‌ چه‌ند ده‌قێكى شیعری شاعیری هاوچه‌رخى كوردى (كه‌ریم ده‌شتى)، ئه‌م لێكۆڵینه‌وه‌یه‌ له‌لایه‌ن (د. هاوژین صلیوه‌) مامۆستا له‌ به‌شی زمانى كوردى فه‌كه‌ڵتى په‌روه‌رده‌ى زانكۆی كۆیه‌پێشكه‌شكراوه‌.

ته‌واوى ژماره‌كانى گۆڤاره‌كه‌ له‌م پێگه‌یه‌ى خواره‌وه‌ به‌رده‌ست ده‌كه‌وێت:

لێرە كليك بكە

ئامادەكردنى : د.دەريا جەمال حەوێزى