كارمەندێكى زانكۆى كۆيە ١٨ مانگە كارى خۆبەخشى دەكات
News #03, Issue 13, Jan 2016 | Núcey #03, Jhimarey 13, Mangí 1 Sallí 2016 | نوچەی ٣، ژمارەى ١٣ مانگی 1 ساڵی 2016
محەمەد مەغديد عەبدوڵا كارمەندى زانكۆى كۆيەيە، ماوەى ١٨ مانگە كارى خۆبەخشى دەكات بۆ ئەو ئاوارانەى لەشارى كۆيە نيشتەجێ بۆتن. لەم نووچەيەدا چيرۆكى ئەنجامدانى كارەكانى وەك خۆبەخشێك دەگێڕێتەوە.
گەر بتەوێت هاوكاريەك پێشكەش بكەى بەو ئاوارانەى لە شارى كۆيە نيشتەجێ بۆتن بەتايبەت لە كەمپە سەرەكيەكە كە پێ ى دەڵێن (سەرڕەزان)، هەر زوو ئاماژە بە ناوى محەمەد مەغديد دەكەن، ئەو لە ليژنەى باڵاى ئاوارەكانى كۆيەيە و بەلاى ئاوارەكانيشەوە ناوێكى ئاشنا و ناسراوە و كەم كەس هەيە نەيناسێت.
چيرۆكەكە لە كوێوە دەستى پێكرد؟
كە تيرۆريستانى داعش لە مانگى هەشتى ٢٠١٤ هێرشيانكردە چەند ناوچەيەك، وەك ئاكامێكى ئەو شەڕە دانيشتوانى ئەو ناوچانە ئاوارە بوون، ژمارەيەك لەو كۆچكردووانە لە شارى كۆيە نيشتەجێ بوون، ئەمە دەبێتە دەستپێكێك بۆ كارەكانى، بەڕێز محەمەد مەغديد دەلێت " له‌دوای داگیركاریه‌كانی داعش ، بۆ سه‌ر شه‌نگال و ده‌شتی نه‌ینه‌وا ، له مانگی هه‌شتی ساڵی 2014 ژمارەيەكى زۆرى ماڵبات ده‌ربه‌ده‌ر بوون و بەشێكيان هاتنە شارى كۆيە.
هه‌ر ئه‌وكات لەگەڵ بەڕێز شێخ چاپووك قائیمقامی كۆیه و برای به‌ڕێزم مامۆستا كاوه به‌رپرسی ڕێكخراوه دیموكراتیه‌كان و كۆمه‌ڵێك له خه‌ڵكی خۆبه‌خش، كه‌مپینیكمان ئه‌نجام دا و شەوێكى مانگى هەشتى ٢٠١٤ به ئاماده‌بوونی په‌خشی راسته‌وخۆی كه‌ناڵی كوردسات توانیمان سه‌دان ته‌ن خۆراك و پێخه‌ف و پێداویستی ژیان كۆكه‌ینه‌وه . كه خه‌ڵكی شاری كۆیه و هه‌ر پێنج ناحیه‌كه و گونده‌كان و كوردانی رۆژهه‌ڵاتی كوردستان - دانیشتوی سنووری كۆیه، پێشمه‌رگه ئاسا ماڵ و خواردنی خۆیان به‌خشی . ئەم شەوە شەوێكى زێرين و پڕشنگداربوو لە مێژووى شارى كۆيە و وەك ديرۆكێكى زيندوو هەميشە خۆى بەيان دەكات؛ له‌و كاته‌وه بڕیارم دا به هه‌موو شێوه‌یه‌ك هه‌وڵ بده‌م خۆبه‌خشانه خزمه‌ت به‌م خه‌ڵكه به‌ڕێزه بكه‌م كه بوونه‌ته میوانی شاره‌كه‌مان ."
وە ئامانجى منيش لەمەدا تەنها " ئه‌وه‌یه كه له ئازار و مه‌ینه‌تیه‌كانیان كه‌م بكه‌مه‌وه . له‌و ساته‌وه به‌به‌رده‌وامی سه‌ره‌ڕای كاری فه‌رمانبه‌ریم دانه براوم و هه‌میشه خزمه‌تم به ئاواره‌كان و له‌گه‌ڵ ئه‌وانیش خزمه‌تم به پێشمه‌رگه و خانەوادەى شەهيدەكان و خه‌ڵكی نه‌داری شاری كۆیه كردووه "
كارى خۆبەخشى پێويستيەكى هەنووكەييە
لەبارەى كارى خۆبەخشيەوە لە كۆمەڵگەى كوردى دەڵێت " باوەڕم وایه له ئێستادا كاری خۆبه‌خشی وه‌ك هه‌ناسه بۆكۆمه‌ڵگای كوردی پێویسته ، چونكە كه‌م وكوری و نه‌بوونی و بۆشایی به‌ڕێوه‌بردنمان هه‌یه . بۆ ئه‌وه‌ی به‌سه‌ر ئه‌م قۆناغه دژوار و ترسناكه‌ی به‌سه‌ر هه‌رێمه‌كه‌مان داهاتووه زاڵ بين پێویسته په‌ره به كاری خۆبه‌خشی بده‌ین؛ چونكە كاری خۆبه‌خشی واده‌كات كه خه‌ڵك و نیشتیمان و خاكمان خۆش بوێت و ماندوو نه‌بین له كاری خزمه‌ت گوزاری و هەرێمەكەمان له جه‌هه‌نه‌مه‌وه بكه‌ین به به‌هه‌شت .
وە بۆئه‌وه‌ی وا له‌سه‌رجه‌م تاكه‌كاتی كۆمه‌ڵگا بكه‌ین كه كاری خۆبه‌خشی بكه‌ن ، پێویسته هۆشیاری خۆبه‌خشی بڵاو بكه‌ینه‌وه و روونی بكه‌ینه‌وه كه چه‌ند پێویستمان به‌وه هه‌یه به كرده‌وه بێینه مه‌یدان و خزمه‌ت بكه‌ین؛ به‌ر له قسه و دروشم له‌خۆمانه‌وه ده‌ست پێ بكه‌ین ، ده‌بی وابكه‌ین كه گیانی نیشتیمان په‌روه‌ری زاڵ بیت به سه‌ر ڕه‌خنه و گله‌ییه‌كان."
كارى خۆبەخشى لەشارى كۆيە زيندووە
له كۆمه‌ڵگای كوردیدا كاری خۆبه‌خشی مێژوویه‌كی دوور و درێژی هه‌یه و هه‌ر له‌كۆنه‌وه كورد به‌وه ناسراوه كه خزمه‌ت به‌خه‌ڵك ده‌كات. بەتايبەت دەربارەى شارى كۆيە دەڵێت " ئه‌گه‌ر ئاوڕ له مێژووی شاری كۆیەش بده‌ینه‌وه چه‌ندان ناوی دیار و ناسراومان ده‌كه‌وێته به‌رچاو ، كه له رابردوودا ئه‌ستێره‌بوون و خزمه‌تی خه‌ڵكیان كردووه . (شاعیره‌كان ، نووسه‌ره‌كان ، هونه‌رمه‌نده‌كان و ئه‌و ژماره زۆره‌ی شه‌هیده‌كانی كۆیه ) وە زۆر له ئاغا و به‌رپرسه‌كانیش له كۆیه هه‌میشه خزمه‌تی خەڵكیان كردووه ، حه‌ماغه‌ی كۆیه ناوێكى ديار و زيندووە و جوانترین نموونه‌یه كه ئاماژه‌ی پێبده‌م ، له‌سه‌رده‌می گرانی و نه‌بوونیدا ماڵه‌كه‌ی خۆی كردۆته فه‌قیرخانه و هاوكاری خەڵكی هه‌ژاری كردووه . "
ئەزموونى ديكەشى هەيە!
بەڕێز كاك محەمەد مەغديد جگە لە كارى خۆبەخشى لەگەڵ ئاوارەكان، وەك مامۆستايەكى خۆبەخشيش لە ئامادەييەكى شارى كۆيە وانە بە پێشمەرگە دەڵێتەوە " له‌ئێستا دا جگه له كاری وه‌زیفی له زانكۆی كۆیه، ئه‌ندامی لیژنه‌ی باڵای ئاواره‌كانی سه‌ربه قائیمقامیه‌تی قه‌زای كۆیه‌م و به‌رپرسی كه‌مپی ئاواره‌كانم ، ئێوارانیش له خوێندنگه‌ی پێشمه‌رگه(ئامادەيى داستانی ئێواران ) خۆبه‌خشانه وانە ده‌ڵێمه‌وه." هەر ئەوەندە نييە بەڵكو مێژوويەكى دووتريش باس دەكات " له‌وه‌ته‌ی هه‌م واهه‌ست ده‌كه‌م كاری خۆبه‌خشی خوێنی ده‌ماره‌كانمه و بۆ ساتیكیش دڵ و جه‌سته‌م جێ ناهێڵی دیارترین كاری خۆبه‌خشی كه ئه‌نجامم دابێت . لەكاتى ڕاپەڕينە مەزنەكە لە ساڵى ١٩٩١ و هاتنی ئاواره‌یه‌كی زۆر بۆ شاره‌كه‌مان ، له‌گه‌ڵ گروپیكی خۆبه‌خش شوێنی حه‌وانه‌وه و پێخه‌ف و نانمان بۆ خەڵك كۆ ده‌كرده‌وه و دابه‌شمان ده‌كرد. له هه‌مان كاتدا بنكه‌ی راگه‌یاندنی كۆیه‌مان دروست كردبوو وه‌ك راگه‌یاندنكار له بنكه‌ی راگه‌یاندنی كۆیه خۆبه‌خشانه كارمان ده‌كرد؛ شه‌وانه‌ش پاسه‌وانی شوێنه‌كه بووین. هه‌ر له دوای ڕاپه‌رینه‌كه‌وه چه‌ندان بتڵ خوێنم به‌خشیوه به بریندارانی پێشمه‌رگه و خه‌ڵكی نه‌خۆش . چه‌ندین كاری هونه‌ری به‌تایبه‌تی شانۆ و درامام خۆبه‌خشانه ئه‌نجام داوه . چه‌ند ساڵێك ئه‌ندامی لیژنه‌ی فێستیڤاڵی یادی هونه‌رمه‌ندی گه‌ل تاهیر تۆفیق بووم .
له ساڵی 2009 وه له گه‌شت و گوزاری كۆیه جگه له‌كاری وه‌زیفیم هه‌میشه خۆبه‌خشانه خزمه‌تی ناوچه شوێنه‌واری و گه‌شتیاریه‌كانم كردووه و سه‌دان فۆتۆی ئه‌م شوێنانه‌م گرتووه و بڵاوم كردوونه‌ته‌وه بۆ ئه‌وه‌ی به‌رچاوبن و گرنگیان پێبدرێت. له زۆربه‌ی جه‌ژن و بۆنه‌كان به‌تایبه‌تی جه‌ژنی نه‌ورۆز من پشووم نه‌بووه و خه‌ریكی دابه‌شكردنی زەرفى خۆڵ و خاشاك و ڕێنمایی گه‌شتیاری و دابین كردنی ئاو و پاككردنه‌وه‌ی شوێنه گه‌شتیاریه‌كان بووم ، هه‌ر له‌گه‌ڵ به‌ڕێوه‌به‌ر و كارمه‌ندانی گه‌شت و گوزاری كۆیه توانيمان گه‌وره‌ترین فێستیڤاڵی جه‌ژنی نه‌ورۆز له ساڵی 2013 ئه‌نجام بده‌ین و چه‌ندین جار گروپی فرۆكه‌وانی په‌ره‌گلایده‌ر داوه‌تی كۆیه بكه‌ین و له شاخی هه‌یبه‌سوڵتانه‌وه به ئاسمانى شاری كۆیه‌دا بفڕن . هەروەها یه‌كه‌م فێستیڤاڵی پێشبڕكێی په‌ره‌گلایده‌رمان به ئاماده‌بوونی چه‌ندین یانه‌ی عێراقی و كوردستانی ئه‌نجام داو یه‌كه‌م هه‌ڵبژارده‌ی عێراق و كوردستانیش له شاری كۆیه لە بنارى شاخى هەيبت سوڵتان هه‌ڵبژێردران ؛ لەگەڵ ئەمانەشدا چه‌ندان شه‌و له‌گه‌ڵ ڕۆژنامه‌نووسان و ئاواره‌كان كاری پاككردنه‌وه‌ی شاری كۆیه‌مان ئه‌نجام داوه."
بوارەكانى كارى خۆبەخشى زۆر و جۆراوجۆرن
سەبارەت بەو كەسانەى كە حەزيان لە كارى خۆبەخشيە و نازانن چۆن و لە كوێوە دەست پێ بكەن، بەڕێز كاك محمەد وەك ئەزمووندارێك دەڵێت" ئەو كەسانە با له به‌ر ده‌رگای ماڵه‌كه‌یانه‌وه ده‌ست پێ بكه‌ن، با له‌پاككردنه‌وه و سه‌وزكردنی سه‌رشه‌قامه‌كانه‌وه ده‌ست پێ بكه‌ن ، با دیوار و شۆسته‌كان ڕه‌نگ بكه‌ن ، با ئه‌و دیوار و شوێنه گشتیانه خاوێن بكه‌نه‌وه له وێنه‌ی ئه‌و ژن و پیاوانه‌ی تا ده‌نگی خه‌ڵك به‌ده‌ست دێنن ئه‌بن به فریشته و ده‌یان به‌ڵێن به خەڵك ده‌ده‌ن ، دواتر ون ده‌بن و ته‌نها وێنه‌كانیان به‌دیواره‌كانه‌وه ده‌مێنن ؛ با له چ بوارێكدا شاره‌زان بێنه مه‌یدان و خزمه‌ت بكه‌ن؛ بوار و دەرفەت زۆرە و هەركەسێك بيەوێت دەتوانێت خزمەت بكات "
هەر لەم بارەيەوە پەيامێكى هەيە بۆ بەرپرسان و دەڵێت "پێم باشه لایه‌نه به‌رپرسه‌كان زیاتر گرنگی به كاری خۆبه‌خشی و خۆبه‌خشان بده‌ن و بتوانن ڕێكخستن له كاره‌كاندا بكه‌ن ، ده‌كرێ بانگه‌واز بكه‌ن و مه‌یدانی كاری خۆبه‌خش بۆ خه‌ڵكی خۆبه‌خش فراوانتر بكه‌ن ؛ هه‌روه‌ها به‌رپرسه‌كانیش زیاتر له خه‌ڵكی ئاسایی له‌بواری خۆبه‌خشیدا ببیندرێن و ئه‌گه‌ر پۆسته‌كانیان نه‌ما ون نه‌بن و هه‌ر خزمه‌ت بكه‌ن "
گرنگە كارى خۆبەخشى بە ڕێنمايى و ياسا ڕێك بخرێت
ئەو كەسانەى كارى خۆبەخشى دەكەن پێويستە ياسا مافەكانيان بپارێزێت و وەك پۆلێن بەنديەك لە كەسانى ديكە جيابكرێنەوە بۆ سوودوەرگرتن لە دەرفەت و ئيمتيازاتەكان، بەڕێز كاك محەمەد دەڵێت " به‌ڕای من ئه‌وكه‌سانه‌ی كاری خۆبه‌خشی ده‌كه‌ن ئامانجیان ئه‌وه نیه كه سوپاس و ستایش بكرێن ، به‌لام خۆ ئه‌گه‌ر پڕۆژه‌یاسایه‌ك هه‌بێت و هه‌م سنوور و مه‌ودای كاری خۆبه‌خشی دیاری بكات و هه‌م ناویان تۆمار بكریت و ڕێز له ماندوو بوونیان بگیرێت تا لەكاتى هەبوونى دەرفەتەكاندا سوودمەند بن ئه‌وه واده‌كات خه‌ڵك زیاتر هان بدرێت بێنه مه‌یدانه‌كه و ناویشیان ون نەبێت."
مێژوويەك بۆخۆتان تۆمار بكەن
ژمارەيەكى زۆر تاك هەن لە كۆمەڵگەدا كە خاوەنى بەهرە و تواناى تايبەتن، بەڵام نەيانتوانيوە پێشكەشى كۆمەڵگەى بكەن " ئەم خەڵكانە وەك ئەوە وايە باڵنده‌یه‌كی ده‌نگ خۆش بخه‌یته قه‌فه‌سه‌وه و سرووشت بێ به‌ش بكه‌یت له جوانی و ده‌نگه خۆشه‌كه‌ی ، كاتیك خوای گه‌وره به‌هره و توانایه‌كی تایبه‌تی به مرۆڤه‌كان به‌خشیوه ، به‌رپرسیارین له‌وه‌ی كه تاچه‌ند له‌خزمه‌تی یه‌كتری به‌كاری دێنین؛ زۆر گرنگه مرۆڤ وابكات له ناو كۆمه‌ڵگاكه‌ی خۆیدا بێته مه‌یدان و سه‌ره‌ڕای كاره‌كه‌ی خۆی كاری خۆ به‌خشی بكات، چونكه ئه‌وه‌ی له ئێستادا پێمان ده‌كرێ له‌وانه‌یه له داهاتوودا نه‌توانین ئه‌نجامی بده‌ین، وە گرنگە بتوانين لە كۆمەڵگەدا مێژوويەك بۆخۆمان تۆمار بكەين "
چەمكى خۆبەخشى
كارى خۆبەخشى بريتى يە لە ئەنجامدانى كارێك لە لايەن كەسێكەوە (كە پێ ى دەڵێن خۆبەخش)بە بێ بەرامبەر لە چوارچێوەى توانا هزرى و جەستەييەكاندا و پێشكەشكردنى بە كۆمەڵگە، خۆبەخشى گەياندنى ئەزموون و توانا كۆكراوەكانە لە لايەن تاكەكان و كارپێكردنيانە بە ئامانجێكى پۆزەتيڤ، هەروەها كارى خۆبەخشى نواندنى هەڵوێستێكى نيشتمانيە كە تاكێك ئەنجامى دەدات. خۆبەخشيش بە كەسێك دەوترێت كە بە بێ هيچ فشار و زۆرلێكردن و پاداشتێك هەڵدەستێت بە ئەنجامدانێكى كارێكى دياريكراو كە لەگەڵ تواناكانيدا يەك دێتەوە.
پێگەى Kurdistan Works كە لەلايەن حكومەتى هەرێمى كوردستانەوە بەڕێوە دەبرێت تايبەت بە دۆزينەوەى هەلى كار، لە نووچەيەكدا دەربارەى كارى خۆبەخشى دەدوێت. لێرە كليك بكە بۆ خوێندنەوەى.
زانيارى تايبەت:
ناو: محەمەد مەغديد عەبدوڵا
بەكالۆريۆس لە زمانى كوردى
ناونيشانى پيشەيى: ياريدەدەرى بەڕێوەبەر
شوێنى كاركردن : بەڕێوەبەرايەتى ڕاگەياندن
تەمەن : ٤٦ ساڵ
دەتوانن سەردانى پێگەى تايبەتى محەمەد مەغديد بكەن لە تۆڕى كۆمەڵايەتى فەيسبووك
