كۆبوونەوەيەك لەبارەى پلانەكانى ساڵى ئاييندە

بەڕێزان سەرۆكى زانكۆ و جێگرى سەرۆكى زانكۆ بۆ كاروبارى كارگێڕى و دارايى لە كۆبوونەوەيەكدا ڕوانگەكانيان دەربارەى پلانى ساڵى ئاييندە دەخەنە ڕوو.

ڕۆژى دووشەممە ١٨/ ٧/ ٢٠١٦ كاتژمێر ١١ى پێش نيوەڕۆ، لە هۆڵى سەرۆكايەتى زانكۆ بەڕێزان پ.ى.د.وەلى مەحمود حەمەد سەرۆكى زانكۆ و پ.ى.د.سەعيد ساڵح حەمەدەمين جێگرى سەرۆكى زانكۆ بۆ كاروبارى كارگێڕى و دارايى لەگەڵ ستافى بەڕێوەبەرايەتى بەكارخستن كۆبوونەوە.

بەڕێز سەرۆكى زانكۆ لەبارەى كۆبوونەوەكەوە وتى " ئێستا زانكۆمان لە قەيرانێكى سەختى داراييدايە، بۆيە پێويستە هەماهەنگى بەهێز لە نێوان سەرجەم كارمەندانى بەڕێوەبەرايەتيەكان هەبێت و بەڕێوەبەرايەتى چاككردنەوەى زانكۆش كۆڵەگەى بەپێوە وەستانى زانكۆيە "

لە ميانەى قسەكانيدا سەرۆكى زانكۆ تيشكى خستە سەر چۆنيەتى ئەنجامدانى كارەكان و وتى " وردەكارى و لێزانى مەرجى سەركەوتنى كارەكانە، لە ئێستادا دۆخى دارايى دەزگاكانى دەوڵەت لە خراپترين دۆخدايە، هەر بۆيە پێويستە كارمەندان بتوانن بەو توانايانەى لە بەردەستدان بە باشترين شێوە كارەكانيان ڕايى بكەن و بير لە ڕێگەى گونجاو بكەنەوە بۆ ئەنجامدانى كارەكانيان"

هەروەها بەڕێز سەرۆكى زانكۆ وێڕاى دەستخۆشى لە كارمەندان كە كارەكانيان بە ڕێكوپێكى ئەنجامداوە، وتيشى " بۆ ئاييندە پێويستمان بە تواناكانتانە و ئێوە لە كەسانى پێشەنگى زانكۆن، كارەكانتان زمانحاڵتانە و ئێوە دەتوانن لە ڕووى داراييەوە هاوكاريەكى ناوازەى زانكۆ بكەن"

بەڕێز سەرۆكى زانكۆ جەختى لە هاوكارى و هەماهەنگى كردەوە لە نێوان كارمەندان، چونكە كارەكانى يەكتر تەواو دەكەن و پێويستە بە يەك تيم كارەكان ئەنجام بدەن.

لاى خۆشيەوە بەڕێز پ.ى.د.سەعيد ساڵح حمدامين جێگرى سەرۆكى زانكۆ بۆ كاروبارى كارگێڕى و دارايى وتى " ئەم كۆبوونەوەمان بۆ ئەوە نيە لێپێچينەوە لەكەس بكەين ، تەنها ئامانجمان هۆشيار كردنەوە و لێكترى گەيشتنە ، دەمانەوێ لە مەبەستى پەيامەكەى سەرۆكى زانكۆ بگەن ، دەمانەوێ پردى پەيوەنديەكانمان بە تينتر بكەين"

لەو ڕوانگەوە بەڕێز ئەندازيار سەركەوت حمد بەڕێوەبەرى چاككردنەوەى زانكۆ روونى كردەوە كە پێويستە بۆ لەمەو دوا هەوڵى دابين كردنى وەرشەيەكى باش بدەين و شوێنێك بێت بۆ رايىكردنى كارەكانمان ، لەهەمان كات داواى ئەوەى كرد كە خەلكانێكى خاوەن بڕوانامە شارەزا هەن لە هەندێك شوێنى زانكۆ دەكرێ كۆيان بكەينەوەو سوود لە ئەزموون و تواناكانيان ببينين .

لە كۆتاييدا بريار درا كە هەماهەنگيەكان پتەوتربكرێن و سوود لە توانا ناوخۆييەكان وەربگيرێن بۆ پەرەپێدانى پرۆژەكانى زانكۆ.

ئامادەكردنى : محەمەد مەغديد

وێنەكان : كاردۆ محەمەد