خولى فێربوونى زمانى فارسى لەسەنتەرى مەلاى گەورە

News #10, Issue 49Jan 2019 | Núcey #10, Jhimarey 49, Mangí 01 Sallí 2019 | نوچەی 10، ژمارەى 49  مانگی 01 ساڵی 2019



بەمەبەستى فێربوونى زمانى فارسى بۆ ئارەزوومەندان و وەرگرتنى نازناوى زانستى بۆهەڵگرانى بڕوانامەى ماستەر لەزمانى كوردى ، سەنتەرى مەلاى گەورە لەزانكۆى كۆيە خولێكى بۆ فێربوونى زمانى فارسى كردەوە. 

خولەكە بۆ ماوەى (٢) مانگە و لە (١٤/١/٢٠١٩) تا (١٤/٣/٢٠١٩) دەخايەنێت و لە ئێستادا خولەكە (١١) بۆ (١٢) خوێندكارى هەيە و ئاستى فێركارى خولەكەش سەرەتاييە. 

د. هاوژين صليوا عيسا سەرۆكى بەشى كوردى لەفاكەڵتى پەروەردە و يەكێك لەمامۆستايانى خولەكە دەڵێت" گرنگى و پێويستى خولەكە دوو لايەنەيە بەجۆرێك لەلايەكەوە سوود بەو خوێندكارانە دەگەيەنێت كەئارەزووى فێربوونى زمانى فارسى يان هەيە و لەلايەكى ديكەوە بۆ ئەو مامۆستايانەى هەڵگرى بڕوانامەى ماستەرن لە زمانى كوردى بەجۆرێك كەدەبێتە ئامادەكارييەك بۆ تاقيكردنەوەى (جامع) كەلەو ڕێيەوە دەتوانن نازناوى زانستى بەدەست بهێنن ، چونكە ئەم تاقيكردنەوەيە هاوتاى تاقيكردنەوەى (تۆفڵ)ە لە زمانى فارسى ."

د. هاوژين ئاماژەى بەوەدا مەنهەجى خوێندنى خولەكە لە زانكۆكانى تاران و زانكۆى فيردەوسى لە مەشهەد وەرگيراون "ماوەى (٢) ساڵە ئێمە هەوڵ دەدەين و ئامادەكارى بۆ كردنەوەى ئەم خولە دەكەين و لەبەرنامەماندايە دواى تەواو بوونى ئەم خولە ، خولى تريش بكەنەوە لەئاستى بەرزتر و خولى تريش بەڕێوەيە بەناوى (پێش ڕەفتە) وهيواداريشين خولى زمانەكانى تريش بكرێتەوە بەتايبەت توركى و عەرەبى و هى تريش."

لەم خولەدا (٣) وانەى سەرەكى دەووترێتەوە كە بريتين لەمانەى خوارەوە: 

1- رێزمانى فارسى لەلايەن (د. ڕێزان صاڵح) دەوترێتەوە. 

2- گفتوگۆ لەلايەن (د. هاوكار باپير) دەوترێتەوە. 

3- خوێندنەوەو تێگەيشتن لەدەق لەلايەن (د. هاوژين صليوا) دەوترێتەوە. 



بە شێوەيەكى گشتى كات و شوێنى وانەكانى خولەكە و پێداويستييەكانى بەجۆرێك ڕێكخراوەو ئامادەكارى بۆكراوە كە گونجاو بێت بۆ مامۆستايان و بەشداربووان. 

زمانى فارسى لەزمانە هەرە نزيكەكانە لە زمانى كوردييەوە هەم لەڕووى زمانەوانى دەستەواژەو گوزارشتەكانى و هەميش لەڕووى كولتورى و فەرهەنگييەوە ئەمە جگەلەوەى فارسەكان دراوسێ و هاوسنوورى كوردن لە دێر زەمانەوە. 

زمانزانانى فارسى لەڕووى ڕۆشنبيرى و بەدەست هێنانى سەرچاوە و بابەتى وەرگێڕدراوى جيهانى زياتر سوودمەند دەبن چونكە لە ئێران گرنگى زۆر بەم بوارەدراوەو بەدەيان دەزگاى چاپ و پەخش و وەرگێڕانى كارامە بوونيان هەيە و زۆر بەئاسانى تازەترين سەرچاوەو بەرهەمى جياوازى بەچاپ گەيەنراو دەست دەكەوێت و ئەمەش زياتر گرنگى و پێويستى كردنەوەى خولى لەم جۆرە بەدەردەخات. 

ئامادەكردنى: محەمەد مەغديد، سامان نەسرەدين
وێنەكان: دڵشاد كاكەڕەش

Comments